નવસારીની પ્રતિષ્ઠિત એસ.બી. ગાર્ડા કોલેજમાં ઇન્ચાર્જ આચાર્યશ્રી ડૉ ધર્મવીર ગુર્જરના માર્ગદર્શન હેઠળ અંગ્રેજી વિભાગ તથા આઈ.ક્યુ.એ. સેલના સંયુક્ત ઉપક્રમે તા. ૦૯/૦૭/૨૦૨૬ ના રોજ ઓરીએન્ટેશન અને કેરીયર કાઉન્સિલ પ્રોગ્રામનું આયોજન કરવામાં આવ્યું હતું. આ કાર્યક્રમમાં પ્રાસંગિક ઉદ્દબોધન આપતાં કોલેજના ઇન્ચાર્જ આચાર્યશ્રી ડૉ ધર્મવીર ગુર્જરે વિદ્યાર્થીઓને સતત પરિશ્રમ કરવા માટે પ્રેરિત કર્યા હતાં. તેઓએ ભારપૂર્વક જણાવ્યું હતું કે, આજના ટેકનોલોજીના યુગમાં બધી જ બાબતો સરળતાથી મળી રહે છે પરંતુ એ બાબતોમાંથી આપણને ઉપયોગી બાબતો શોધવી કેવી રીતે એ જ્ઞાન શિક્ષક પાસેથી જ મળશે. વધુમાં તેઓએ વિદ્યાર્થીઓને પોતાના ધ્યેય માટે સતત પરિશ્રમ કરવા અને અજ્ઞાનતાની નિંદ્રામાંથી જાગી જવા હાકલ કરી હતી અને આવા કાર્યક્રમો યોજવા માટે સમગ્ર વિભાગને અભિનંદન પાઠવ્યાં હતાં. આ કાર્યક્રમમાં ઉપાચાર્યશ્રી ડૉ. હિતેશભાઈ પટેલે પણ ઉપસ્થિત રહી વિદ્યાર્થીઓનો ઉત્સાહ વધાર્યો હતો. આ પ્રસંગે અંગ્રેજી વિભાગના અધ્યક્ષા ડૉ. રાધા ગૌતમે અંગ્રેજી વિભાગનો સમગ્ર ચિતાર રજૂ કર્યો હતો સાથે જ ડૉ. જીતેન્દ્દ્ર પરમાર અને માનસીબા સરવૈયા દ્વારા અંગ્રેજી વિભાગ દ્વારા કરવામાં આવતી વિવિધ રચનાત્મક પ્રવૃતિઓ વિશે માહિતી આપવામાં આવી હતી. આ જ વિભાગના અધ્યાપક ડૉ. નેહા હરિયાણીએ અંગ્રેજી વિભાગમાં અભ્યાસ બાદ રોજગારના વિવિધ ક્ષેત્રમાં રહેલી તકો વિશે માહિતી આપી હતી. સાથે જ તેઓએ રાષ્ટ્રીય શિક્ષા નીતિ - ૨૦૨૦ દ્વારા એક સાથે બે ડીગ્રી મેળવવાની તકનો વિશેષ ઉલ્લેખ કર્યો હતો. આ સમગ્ર કાર્યક્રમનું સંચાલન અંગ્રેજી વિભાગના અધ્યાપક શ્રી અત્રી જોષી દ્વારા કરવામાં આવ્યું હતું.
